KAASH MEIN TERI MAA NAA HOTI

KAASH MEIN TERI MAA NAA HOTI

BY JAVED ZAHEER, FREE EXPRESSION AWARD WINNER

            TORONTO: Haan, kaash mein tum logoun ki maa naa hoti. Chund chor dakoo looteroun ne meray moo pe kaalik mal di aur saari dunya mein ruswa kara diya aur tum loug khamoshi aur beghairti se tamasha dekhtay rahay.

            Kub aagay barh kar maa ki izzat aur azadi bachao ge ya yun hi tamasha dekhtay raho ge. Afsoos, tum bhi chor, dakoo aur looteroun ke saath milkar meri izzat ki dhajjian ura rahay ho aur mujhay barbad kar rahay ho. Apni maa ki izzat ki dhajjian. Kia waqai mar gaya hai tumhara zamir aur tumhari ghairat.

            Aaj tum meri izzat ki hifazat nahi kar rahay ho aanay wala kal tumhari izzat se khelay gaa tumhain ghulam bana kar. Dekh lena tum. Ye meri bud-duwa  nahi hai. Jo kuch bhi hogaa tumhari apni beghairti aur tumharay apnay kartootoun ki wajah se hogaa. Mein tu maa hoon  bud-duwa bhi nahi de sakti sirf tumhain dukhoun mein dekh kar tarap sakti hoon apna dukh aur ghum bhula ke. Kaash mein teri maa naa hoti aur ye din naa dekhnay partay.   

            Ye dard bhari aah Pakistan ke tootay huway dil se nikal rahi hai. Wo dil jo zakhmoun se choor choor ho chuka hai. Wo shikasta dil jo ab ahista ahista dharak raha hai aur kisi bhi lamhay dharakna bund kar sakta hai hamari apni ghaltiyun, laa-par-wahiyoun aur beghairti ki wajah se.

            Hamaray bahadur aur ghayyur jawan wardi pehen kar kis ki hifazat kar rahay hain jub ki gharib awam aur mulk donoun sisak sisak ke mar rahay hain. Inki madad aur hifazat kaun karay gaa. Kia ye chor dakoo aur looteroun ke agay itna bay bus hogai hain. Tu phir kiyun qasam khai thi aur ehad kiya tha mulk aur qaum ki hifazat ke liye. Aaj tumhari khamoshi aur buzdili ki wajah se yehi chor dakoo aur looteray aish kar rahay hain.

            Kia hamaray jawanoun aur leaders mein koi aik bhi Allah ka bunda aisa nahi hai jo mulk aur qaum ke liye kuch acha karay aur gundagi ko saaf karay. Hai koi mard ka bacha in jawanoun aur leaders mein. Agar hai tu uthay aur aagay barh kar badal daalay mulk aur qaum ki taqdeer ko.

            ---Javed Zaheer (JAZA/JAYZEE/JZEE), Free Expression Award Winner, Desi Idol Recognition Award Winner, Member/Honorary Director of NEPMCC, Veteran Active Member (VAM) of Toronto Press Club, Ex-Member of The National Club and The Ontario Club, Honorary Editor of English Weekly `Pakistan Abroad’, ex-Chief Editor (Honorary) of English Weekly `The Ambassador’, ex-Senior Sub-Editor of English Daily DAWN, Pakistan, Chairman, CANOPI, and Director, Canpak Camber of Commerce, is contributing purely on Voluntary and Honorary Basis in order to serve all people and communities. Contact: (416)696-0981/jazamedia@hotmail.com. To read more JZ’s exclusive articles, please visit the following websites: www.letstree.com (Pressing needs section), nepmcc.ca  and nationalethnicpress.com  (Home Pages & Editorial Sections. Scan years from 2004 to 2011.